ELIMINA UN PUNTO DA ORDE DO DÍA PARA QUE AS TRABALALDORAS E TRABALLADORES NON O VEXAN VOTAR EN CONTRA
Situemos o acontecido en plena desfeita de “Alimentos
Lácteos” (a antiga Pascual). Estamos a finais do ano 2.012 cando os
traballadores e traballadoras, co apoio incondicional da CIG e do BNG, tentan
evitar que unha empresa tan importante, radicada en Outeiro, desapareza. O
historial de desastres fora longo até o intre presente e nel participaran a
propia Xunta de Galiza e recoñecidos membros do Partido Popular, nomeadamente
dous ex-cargos do dito partido que foron os xestores encargados de conducir a
empresa á quebra facendo “desaparecer” varios millóns de euros e deixando débedas
por toda a comarca. Mentres isto acontecía o alcalde de Outeiro, Señor Pardo, e
o conselleiro de agricultura que organizara a montaxe, Señor Juárez, ficaban
calados.
Daquela, no Pleno celebrado o 28 de nadal do citado ano 2012,
o Comité de Empresa de Alimentos Lácteos presentara un escrito pedindo o apoio
da Corporación. Ese mesmo día ían ser debatidas outras dúas mocións
relacionadas coa grave situación padecida polas persoas afectadas na propia
empresa e na comarca, que eran numerosas, presentadas pola CIG e polo BNG
respectivamente. Unha vez aprobada por unanimidade a presentada polo mencionado
Comité de Empresa o Alcalde, facendo gala do seu concepto autoritario: democracia
é o que eu digo, retirou unilateralmente o punto 6º da Orde do Día
presentada previamente aos grupos políticos do Consistorio. Neste punto
figuraban as dúas Mocións que interpuxeran en tempo e forma a Confederación
Intersindical Galega e o Bloque Nacionalista Galego.
Xa vemos. Cando non quere votar favor e non pode votar en
contra porque están as traballadoras e traballadores diante, simplemente “fúmase”
o punto da orde do día.
Esta é a forma de exercer a democracia do Alcalde!
